بمجرد أن أنهى أبو زياد حديثه معي ، طأطأ رأسه وأرخى أذنيه ، وكذلك حدا حدوه كل السرب الحيواني  من ورائه .. عمت المكان سحابة صمت رهيب ثم هز رأسه بشموخ وأنشد قائلا: 

يا بنــادم حكــــي ماصــار      واش أنا بـصــــح حمـــــار ؟

شكون فينا ديما يدمــــــر      وشكـــون فينا ديما صبــار؟

ياك أنا حــملت  ثقـــــالك      فسفارك وفـــكل امــصــار

فزمان كنت عايش مقهور      لا ســيارة.. لا قــــــــــطار

نحرث أرضك بهمة وصبــر      فيها نبتات غـلة وثمـــــــار

اليوم صبحتي شان وشان    قلتـــي أنا عـــندي جـــرار

خليتي البردعة والشواري     نسيتـي ايام كنت عــــطار

ما بين الدشرة والحومــــة     فمسا وصباح مــن دار لدار

واليوم فظــهري كرويلـــــة    زادت امــحانــي لـيل نهار

فشـــغالك خـــادم مطيــع    حاضر فلحال كاتــم لسرار

وعلى ظهري ينزل السوط    وكتـــاب أنا نقاســى لضرار

قــــهــرتيـــني بشــــا ورّا     بالقــــوافـــي وكـــلام العار

فيـــــن أنا و فـــين أنــت ؟    وشكون فينــــا هــــو غدار ؟

قلتــي عندك حكمة وعقل    لمروة وهــــمّـة و افـــــكار

لكن لعــقل تــاه فظـــلامو    وصـبحتــي ظالــم جبـــــار

قلتي : لحمار يا بو وذنين !    هكذا عليك حكـــمات اقدار

لكـــن الراس بـــلا وذنيـــن    كيتو كيا وما جــاب اخــــبار

قلتي لحمار فسما ركـــال    فــالأرض سحابـة ملغبــــار

وشحال من امثال وحكايات   ومــادى قلتــــي ملــــخبار

يابنـــادم يا كحــل الـــراس    مالك تايـه ؟ مـالك مــحتار؟

مــالك غافل فــهاذ الــكون    خربتي الأرض وشعلتي نار!

حكّم عقلك دير ليه لـــجام    هكذا قالـــوا نــاس ابــــــرار

حروبك شلا وفنيتـي ارواح     تهّــدا ت جبال وخــلات ديار

بعـــدما الـله خلـــق الكون    وعطاك الحكمـــة والأنـــــوار

ذقتي التفّاحــة وعصــيتي    وصبحتي طــــاغي ملشرار

رماني سعدي في غـــابة    وحـــــوشــها ناس يا حضار !

شكيت همومي لسبـوعا    والشــكوى للـّــه القـــهـــار

قالــــــوا سر يا لبهيمــــة    اللّي بحالك يمشـــــي للنار

اللي بحالك فهــــاذ الدنيا    ما عندو فيــــــها مـــا يــــدّار

ويا ندامتي فهـــاذ الوجود    مصاب الشوك يرجـــــع ازهار !

هــرّط هــرّط يا بنـــــــادم     عيّــط عيطــة من فوق اسوار !!

غيــــــر جاوب بالصـــراحة    واش  أنا بــــــصـــــح حمـــار ؟